Castellano | Galego

O profesorado de Galicia fórmase e comprométese da man da campaña "Móvete pola Igualdade".

Desde o pasado mes de abril, e ao longo dos vindeiros dous anos, os Centros de Formación e Recursos de Galicia converteranse en aliados da campaña "Móvete pola Igualdade" acollendo a realización de Obradoiros de Introdución á Educación para a Igualdade de Xénero.

Esta iniciativa de colaboración foi posible grazas ao bo entendemento co CFR de Vigo e a Subdirección Xeral de Ordenación e Innovación Educativa da Xunta de Galicia, e ao interese de ambos pola campaña.

O quefacer formativo da campaña comezou polo CFR de Vigo, no que tivo lugar o primeiro taller de 9 horas, os días 14, 15 e 16 de Abril de 2008. Para a ocasión, púidose contar como formadoras con Alicia de Blas, de InteRed, e con Maljorys del Carmen Peña Sánchez, representante do Centro Cultural Poveda da República Dominicana, que, grazas á colaboración da Xunta de Galicia, visitaba neses días a comunidade para realizar un intercambio educativo co profesorado dos centros galegos.

A finalidade destes talleres é promover unha educación non sexista, que faga visible a importancia da equidade de xénero no desenvolvemento, e que fortaleza as organizacións sociais e institucións educativas.

A través desta primeira formación, o profesorado confirmou a necesidade de incorporar o enfoque de xénero nos procesos socio educativos da escola, como factor clave para o desenvolvemento dunha práctica que promova cambios significativos nos procesos de socialización do alumnado, unha práctica que xere novas formas de relacionarnos mulleres e homes, unha práctica non discriminatoria que rompa con todos os estereotipos e prexuízos sexistas, que cuestione os modelos tradicionais, que posibilite a construción de estratexias para facer posible a prevalencia da equidade, a tolerancia e a xustiza social.

A próxima acción de formación terá lugar en Tomiño (Pontevedra) o vindeiro mes de Novembro.